tg-me.com/hussainn11/4437
Last Update:
نعي عن شفاعة أمير المؤمنين علي عليه السلام
ياحاضر الشده يبو الحمله علي
ياولي الله وضخر سيد البشر
لو درت رأسي عله القبله ومتت
ونزل ملك الموت يم رأسي وحضر
وأنه اصيح اليوم يومك ياعلي
الموت اجاني ولا تخليني بخطر
الموت مر وخفت من راح الهوى
وحتى صار الساني يابس وانفطر
وگال عزرائيل ابشر لا تخاف
انه اريحك لو حضر فارس مضر
__
ياابو الحسن يانور العيون
يگولون تحضر لليونون
وتگللهم يشيعه لا تخافون
ولجنه بحضورك يگولون
ياابو الحسن تتعذر شلون
_
يوم الحساب نصيح حيدر
نريدك بذاك اليوم تحضر
قبل لا يطب للگبر منكر
وقبل لا تجيني النار والحر
ندبنه أبو حسين وماتعذر
__
وينك يبو الغيره يمغوار
نزلنه بجوارك يحامي الجار
وعندك يبو الحسنين خطار
حسره الهوى وضلمه ورمل حار
ونصيح ياحيدر الكرار
____
اندهك ليلة الوحشه يبو حسين
لو اجه الحساب ودمعت العين
ولو خلو اخدودي عله الطين
ولو دنو چفوف الميازين
أنه ابشاربك وانت الحنين
بيك الأمل يابطل صفين
__
أنت علي وانت الضخيره
تحضر الميت يبو الغيره
بجاه المشت لشام أسيره
امامي وإلك هيبه چبيره
ينزلونّي بذيچ الحفيره
لا مال ينفع لا عشيره
___
لاولـد يـنـفعني ولا مـال
لو شدو التابوت بحبال
وجسمي اعله متن الزلم ينشال
نزل النعش ما واحد الگال
وصلت الغري وذيچ الرمال
ساعه وعليه الترب ينهال
علي... يا ابو الحسن وينك تعال
أحضر وشوف اشصار بلحال
//////////////////////////////////////////
بقلم شاعرة أهل البيت عليهم السلام المله أم ريام دخيل الركابي ✍...
تجدونها في ديوان الرأس المطبور والضلع المكسور الجزء الرابع
BY قناة(مأتم فاطمه)لشاعرة الحسين( ع) أم ريام دخيل الركابي🎤🎤
Warning: Undefined variable $i in /var/www/tg-me/post.php on line 280
Share with your friend now:
tg-me.com/hussainn11/4437